2024-nji ýylyň birinji çärýeginde Türkmenistanyň Energetika ministrligi önüm öndürmegiň, işleri we hyzmatlary ýerine ýetirmegiň meýilnamasyny 114,4 göterim ýerine ýetirdi. Elektrik energiýasyny öndürmegiň ösüş depgini 100,8 göterime barabar boldy.
Bu barada Türkmenistanyň Ministrler Kabinetiniň mejlisiniň dowamynda hasabat berildi. Şunuň bilen birlikde, wise-premýer B.Annamämmedow ýanwar — mart aýlarynda gurluşyk-senagat toplumynda öndürilen önümleriň we işleriň meýilnamasynyň 121,8 göterim ýerine ýetirilendigi barada hasabat berdi. Hasabat döwründe Gurluşyk we binagärlik ministrligi boýunça ýerine ýetirilen işleriň meýilnamasy 107,3 göterim, Senagat we gurluşyk önümçiligi ministrligi boýunça 102,7 göterim berjaý edildi.
«Türkmenhimiýa» döwlet konserni (152,8%), Awtomobil ýollarynyň gurluşygyny dolandyrmak baradaky döwlet agentligi (115,1%) we Aşgabat şäheriniň häkimligi (113%) hem ýokary netijeleri görkezdiler.
Hormatly Prezidentimiz Serdar Berdimuhamedow hasabaty diňläp, gurluşyk we senagat toplumy boýunça öndürilýän önümleriň möçberini has-da artdyrmak üçin degişli işleri dowam etdirmegiň wajypdygyny belledi. Döwlet Baştutanymyz wise-premýer B.Annamämmedowa täze kärhanalary işe girizmek, önümçilik kuwwatlyklaryny netijeli peýdalanmak, meýilnamalary üstünlikli ýerine ýetirmek üçin zerur çäreleri görmegi tabşyrdy.
