Mejlisiň Başlygy D.Gulmanowa parlamentiň nobatdaky maslahatyna taýýarlyk görlüşi barada habar berdi. Onuň dowamynda energiýany tygşytlamak, gidrometeorologiýa, halkara awtomobil gatnawlary, weterinariýa meseleleri bilen baglanyşykly kanunlara, Raýat iş ýörediş we Maşgala kodekslerine, Ýer hakynda bitewi kanuna üýtgetmeler girizmek boýunça kanunlaryň taslamalaryna garamak meýilleşdirilýär.
Bular dogrusynda Türkmenistanyň Ministrler Kabinetiniň nobatdaky mejlisinde habar berildi diýip, TDH habar berýär. Şeýle hem mejlisiň dowamynda milli hukuk binýadyny kämilleşdirmegiň we hereket edýän kanunçylyk namalaryny döwrüň talaplaryna laýyk getirmegiň meseleleri ara alnyp maslahatlaşyldy.
Türkmenistanyň Prezidenti Serdar Berdimuhamedow halkara tejribeden ugur alyp, ýurduň kanunçylygynyň döwrebap we kämil bolmagy üçin netijeli işleri dowam etdirmegiň zerurdygyny belledi.
