Türkmen halky Milli bahar baýramy — Halkara Nowruz gününi ýokary ruhubelentlik bilen garşylady. Esasy dabaralar Ahal welaýatynyň Ak bugdaý etrabyndaky «Nowruz ýaýlasynda» ýaýbaňlandyryldy diýip, TDH habar berýär.
Hormatly Prezidentimiz Serdar Berdimuhamedow dabaralara gatnaşyjylara iberen Gutlagynda galkynyşyň, gülleýşiň we täzelenişiň baýramy bolan Nowruzyň taryhy ähmiýetini nygtady. Döwlet Baştutanymyz Nowruz baýramynda ýerine ýetirilýän joşgunly aýdym-sazlaryň agzybirligiň hem dost-doganlygyň owazyna öwrülip, hemişe belentden ýaňlanmagyny arzuw etdi.
Baýramçylyk mynasybetli dabaralara Hökümet agzalary, Mejlisiň, Halk Maslahatynyň, jemgyýetçilik guramalarynyň we diplomatik wekilhanalaryň wekilleri gatnaşdylar. Döredijilik toparlary türkmen halkynyň baý medeniýetini özünde jemleýän teatrlaşdyrylan sahnalary, aýdymlary we tanslary ýerine ýetirdiler.
Ak öýler dikilip, türkmen obasy ýaýbaňlandyryldy. Onda halk senetçiliginiň eserleri, haly önümleri, keşdeler we zergärçilik sungatynyň önümleri görkezildi. «Galkynyş» milli at üstündäki oýunlar toparynyň ahalteke bedewlerine atlanan çapyksuwarlary görkezme çykyşlary ýerine ýetirdiler.
Şeýle hem baýramçylyk mynasybetli dabaralar ýurduň ähli welaýatlarynda geçirildi we olarda türkmen halkynyň medeni mirasynyň köpöwüşginliligi öz beýanyny tapdy.
