Aşgabatda Halkara zenanlar güni mynasybetli guralan dabaralaryň çäklerinde «Ene mähri» diýen hormatly ada eýe bolan köp çagaly enelere ähli amatlyklary bolan täze ýaşaýyş jaýlarynyň açarlaryny gowşurmak dabarasy geçirildi. Çäre Türkmenistanyň Prezidenti Serdar Berdimuhamedowyň tabşyrygy esasynda geçirildi diýip, TDH habar berýär.
Türkmenistanyň Prezidentiniň Permanyna laýyklykda, şu ýylda zenanlaryň ýüzlerçesine «Ene mähri» diýen hormatly at dakyldy. Köp çagaly eneleri sylaglamak dabarasy bilen bir hatarda, köp çagaly maşgalalar ýokary amatlyklary bolan ýaşaýyş jaýlarynda täze giň öýlerde jaý toýuny tutdular.
Dabarada Garaşsyz Türkmenistany ösdürmekde zenanlaryň eýeleýän aýratyn orny bellenildi. Dabara gatnaşyjylar türkmen gelin-gyzlarynyň bagtyýar durmuşy we zähmet çekmekleri babatda hemmetaraplaýyn goldawlary, ösüp gelýän ýaş nesli terbiýeläp ýetişdirmek hem-de jemgyýetde ýokary ruhy-ahlak gymmatlyklaryny gorap saklamak ugrunda edýän aladalary üçin döwlet Baştutanyna hoşallyk bildirdiler.
