Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkiýe Respublikasyna iş saparynyň dowamynda üçünji Antalýa diplomatiýa forumyna gatnaşdy. Ol öz çykyşynda halkara energetika hyzmatdaşlygyny ösdürmegiň möhümdigini we Türkmenistanyň tebigy gazy iri eksport ediji hökmünde orny barada aýtdy diýip, TDH habar berýär.
Türkmenistanda halk häkimiýetliliginiň ýokary wekilçilikli edarasynyň ýolbaşçysy tebigy gazyň gorlary boýunça Türkmenistanyň dünýäde dördünji orny eýeleýändigini we gory 27 trillion kub metrden hem gowrak bolan iri «Galkynyş» gaz känine eýelik edýändigini belledi. Türkmenistan tebigy gazy köp döwletlere eksport edýär we dürli sebitlere iberilmegini ýola goýmaga taýýardyr.
Saparyň dowamynda gaz pudagynda Türkiýe bilen hyzmatdaşlyk etmek hakynda resminamalara gol çekildi. 2018-nji ýylda kabul edilen Hazar deňziniň hukuk derejesi hakynda Konwensiýa laýyklykda, Hazar deňziniň we Azerbaýjanyň üsti bilen türkmen gazyny Türkiýä eksport etmegiň mümkinçilikleri ara alnyp maslahatlaşyldy.
Türkmenistanyň Halk Maslahatynyň Başlygy ýurduň energiýa pudagyny diwersifikasiýalaşdyrmaga, gazy gaýtadan işleýän ulgamlary ösdürmäge we gymmat bahaly önümleriň önümçiligine ygrarlydygyny tassyklady.
