Aşgabatda Türkmenistanyň daşary işler ministri Raşid Meredow bilen Owganystanyň daşary işler ministriniň wezipesini wagtlaýyn ýerine ýetirijisi Amir Han Mottakiniň arasynda geçirilen duşuşykda energetika taslamalarynyň iş ýüzünde durmuşa geçirilmegi bilen baglanyşykly meseleler ara alnyp maslahatlaşyldy diýip, Türkmenistanyň DIM-niň resmi saýty habar berýär.
Taraplar TOPH gaz geçirijisi we TOP elektrik geçiriji ulgamy ýaly iri taslamalaryň iş ýüzünde durmuşa geçirilmegi bilen baglanyşykly alnyp barylýan işlere seljerme berdiler. Şunda iki ýurduň hem Owganystanyň çägindäki desgalaryň gurluşygyny dowam etdirmäge ýokary derejede taýýardygy beýan edildi.
Mundan başga-da, duşuşygyň dowamynda ulag infrastrukturasynyň meselelerine we Owganystan üçin ýokary derejeli hünärmenleri türkmen bilim edaralarynda taýýarlamagyň mümkinçiliklerine garaldy. Taraplar daşary işler ministrlikleriniň derejesindäki gepleşikleri yzygiderli dowam etdirmek hakynda ylalaşdylar.
