Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag «akylly» şäherine iş saparyny amala aşyrdy diýip, TDH habar berýär.
Türkmenistanda halk häkimiýetliliginiň ýokary wekilçilikli edarasynyň ýolbaşçysy şäherde gurulýan desgalaryň, şol sanda Arkadag şäheriniň çagalar seýilgähiniň baş meýilnamasy we Döwlet muzeýiniň şekil taslamasy bilen tanyşdy. Şeýle hem Halk Maslahatynyň Başlygy bu ýerde şäheriň ýolbaşçylarynyň gatnaşmagynda iş maslahatyny geçirdi, onuň dowamynda şäheriň gurluşygynyň ikinji tapgyrynda alnyp barylýan işleriň depgini ara alnyp maslahatlaşyldy.
Mundan başga-da, türkmen halkynyň Milli Lideri oba hojalyk toplumynyň ylmy-önümçilik merkezine we Gurbanguly Berdimuhamedow adyndaky çagalar sagaldyş-dikeldiş merkezine baryp gördi. Türkmenistanda halk häkimiýetliliginiň ýokary wekilçilikli edarasynyň ýolbaşçysy bu ýerde lukmançylyk hyzmatlaryny gowulandyrmak boýunça görkezmeleri berdi.
Türkmenistanyň Halk Maslahatynyň Başlygy Arkadag şäherinde döredilmegi göz öňünde tutulýan lukmançylyk klasteriniň nyşany bilen tanyşdy. Bu nyşanyň milli ýörelgelere laýyk hem-de häzirki döwrüň ruhuna doly kybap gelmegi üçin halkara derejede ykrar edilmegi babatda degişli işleriň geçirilmelidigi tabşyryldy.
