Aşgbatda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklygynda Maslahatlar merkezinde Türkmenistanyň Halk Maslahatynyň Prezidiumynyň mejlisi geçirildi. «Türkmenistany 2024-nji ýylda durmuş-ykdysady taýdan ösdürmegiň we maýa goýum Maksatnamasyny» üstünlikli durmuşa geçirmek boýunça gaýragoýulmasyz wezipeler mejlisiň esasy meselesi boldy diýip, TDH habar berýär.
Mejlise Halk Maslahatynyň Prezidiumynyň agzalary, Mejlisiň deputatlary, syýasy partiýalaryň we jemgyýetçilik birleşikleriniň wekilleri gatnaşdylar.
Türkmen halkynyň Milli Lideri Magtymguly Pyragynyň doglan gününiň 300 ýyllygynyň belleniljek ýylynda hormatly Prezidentimiz Serdar Berdimuhamedow tarapyndan tassyklanan Maksatnamada öňde goýlan gaýragoýulmasyz wezipeleri üstünlikli durmuşa geçirmek boýunça alnyp barylmaly işlere ünsi çekdi.
Türkmenistanyň Halk Maslahatynyň Başlygy Gurbanguly Berdimuhamedow 2023-nji ýylda ösüş maksatnamasynyň ähli wezipeleriniň üstünlikli ýerine ýetirilendigini belledi. Arkadag şäheri dabaraly ýagdaýda açyldy, soňra bolsa «akylly» şäheriň ikinji tapgyrynyň gurluşygyna badalga berildi.
Dünýäde bolup geçen ykdysady çökgünliklere garamazdan, Türkmenistanda jemi içerki önümiň ösüş depgini durnukly saklandy – ýylda ortaça 6 göterimden ýokary boldy. Soňky 15 ýylyň dowamynda jemi içerki önümiň möçberi 4 essä golaý artdy diýip, türkmen halkynyň Milli Lideri belledi.
Şeýle hem senagat önümçiliginde durnukly ösüş gazanylýar. Geçen ýyllar bilen deňeşdirilende, 2023-nji ýylda öndürilen senagat önümleriniň möçberi 3 esseden gowrak köpeldi. Içerki bazarda haryt üpjünçiligi doly kanagatlandyrylýar – bölek satuw haryt dolanyşygynyň möçberi 2008-nji ýyldan bäri 9 essä golaý artdy
