9-njy fewralda geçirilen Türkmenistanyň Ministrler Kabinetiniň giňişleýin mejlisinde ýurdumyzyň energetika toplumynda 2023-nji ýylda alnyp barlan işleriň jemi jemlendi diýip, TDH habar berýär.
Ministrler Kabinetiniň Başlygynyň orunbasary B.Annamämmedowyň hasabatynda bellenilişi ýaly, Energetika ministrligi tarapyndan önümleri öndürmegiň, işleri ýerine ýetirmegiň meýilnamasy 113,3 göterim berjaý edildi. Elektrik energiýasyny öndürmegiň ösüş depgini 101,9 göterime barabar boldy.
Türkmenistanyň Prezidenti Serdar Berdimuhamedow öz çykyşynda elektroenergetika ulgamynda önümçilik kuwwatlyklarynyň mundan beýläk-de ýokarlandyrmagyň möhümdigini belledi. Döwlet Baştutanymyz täze elektrik stansiýalaryny gurmak, paýlaýjy ulgamlaryň tehniki ýagdaýlaryny gowulandyrmak, hereket edýän bitewi energiýa ulgamyny halkalaýyn birleşdirmek boýunça işleri dowam etdirmegiň zerurdygyny belledi.
Türkmenistanda «ýaşyl» energetikany ösdürip, Gün elektrik stansiýalaryny gurmak işlerini netijeli dowam etdirmegiň zerurdygy aýratyn nygtaldy. Şeýle hem birnäçe iri elektrik stansiýalarynyň gaz turbina desgalaryny utgaşykly dolanyşyga geçirmek boýunça wezipeler kesgitlenildi.
Bu meýilnamalaryň durmuşa geçirilmegi içerki we daşarky sarp edijileri elektrik energiýasy bilen ygtybarly üpjün etmäge ýardam berer diýip, döwlet Baştutanymyz nygtady.
