Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäherinde lukmançylyk klasterini döretmek boýunça maslahat beriş hyzmatlaryny ýerine ýetirmek barada yglan edilen halkara bäsleşikde ýeňiji bolan GFR-iň «Goetzpartners Emerging Markets GmbH» kompaniýasynyň ýolbaşçylary bilen duşuşdy diýip, TDH habar berýär.
Duşuşygyň netijeleri boýunça Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komiteti bilen GFR-iň «Goetzpartners Emerging Markets GmbH» kompaniýasynyň arasynda özara düşünişmek hakynda Ähtnama gol çekildi.
Türkmenistanyň Halk Maslahatynyň Başlygynyň belleýşi ýaly, Arkadag şäherinde dörediljek halkara derejedäki lukmançylyk klasteri diňe bir içerki bazar üçin däl, eýsem, eksport üçin hem dürli görnüşli lukmançylyk önümlerini öndürmäge niýetlenendir.
Öz gezeginde, «Goetzpartners Emerging Markets GmbH» kompaniýasynyň ýolbaşçylary maslahat beriş hyzmatlarynyň ýokary derejede ýerine ýetiriljekdigine ynandyrdylar. Şeýle hem olar Türkmenistan bilen hyzmatdaşlygy giňeltmäge gyzyklanma bildirýandiklerini bellediler.
Türkmen halkynyň Milli Lideri germaniýaly hyzmatdaşlary täze bilelikdäki taslamalary durmuşa geçirmek üçin bar bolan ägirt uly mümkinçiliklerden netijeli peýdalanmaga çagyrdy.
