Türkmen halkynyň Milli Lideri, Türkmenistanyň Halk Maslahatynyň Başlygy, Hormatly il ýaşulusy Gurbanguly Berdimuhamedow Köpetdagyň etegindäki gözel künjekleriň birinde ýerleşýän Arkadag şäheriniň täze athana toplumyna bardy diýip, TDH habar berýär.
Şeýle hem Gahryman Arkadagymyz atly gezelenç etdi hem-de täze şäheriň ikinji tapgyrynda gurulmagy meýilleşdirilýän binalaryň şekil taslamalary bilen tanyşdy.
Türkmen halkynyň Milli Lideri täze «akylly» şäherde ekologiýa talaplaryny berjaý etmägiň möhümdigine ünsi çekdi, şeýle hem şäheriň gurluşygynyň ikinji tapgyrynda meýilleşdirilen gurluşyklaryň ýokary hil derejesini üpjün etmek hem-de bu işleri bellenilen möhletlerde tamamlamak bilen baglanyşykly meseleler boýunça iş maslahatyny geçirdi.
Türkmenistanyň Halk Maslahatynyň Başlygy Gurbanguly Berdimuhamedow döwrebap Arkadag şäheriniň gurluşygynyň taryhy ähmiýetiniň bardygyny, hut şonuň üçin hem gurluşyk işleriniň döwrüň talabyna laýyk derejede alnyp barylmalydygyny, şunda täzeçil tehnologiýalaryň we sanly ulgamyň işjeň peýdalanylmalydygyny belledi.
Türkmen halkynyň Milli Lideri Arkadag şäherine saparynyň dowamynda Akdost atly türkmen alabaýynyň Russiýanyň çempionatynda ýeňiji bolmagy mynasybetli gutlag bilen çykyş etdi.
2021-nji ýylda Halkara «Türkmen alabaý itleri» assosiasiýasynyň hem-de Halkara ahalteke atçylyk assosiasiýasynyň Prezidenti Serdar Berdimuhamedow tarapyndan Tatarystan Respublikasynyň Baştutany Rustam Minnihanowa sowgat berlen Akdost atly türkmen alabaýy «Merkezi Aziýa owçarkasy» diýen ýaryşda iki ugur boýunça Russiýanyň çempiony boldy.
Halkara «Türkmen alabaý itleri» assosiasiýasynyň hem-de Halkara ahalteke atçylyk assosiasiýasynyň wise-prezidenti B.Rejebow türkmen alabaýlarynyň dünýä ýüzündäki şöhratynyň belende galýandygyny alamatlandyrýan güwänamalary uly buýsanç bilen kabul etdi.