Türkmenistanda Täze, 2024-nji ýyl paýtagtymyzdaky «Älem» medeni-dynç alyş merkeziniň öňündäki meýdançada ýurdumyzyň Baş arçasynyň ýanynda geçirilen giň gerimli dabaralar bilen garşylandy. Döwrebap aragatnaşyk serişdeleriniň kömegi bilen teleköpri arkaly bu dabara ýurdumyzyň ähli bäş welaýatynyň ýaşaýjylary gatnaşdylar diýip, TDH habar berýär.
Hormatly ýaşulular, kümüş saçly eneler, häkimler, Arkadag şäheriniň we ähli welaýatlaryň hormata mynasyp ýaşaýjylary, ýurdumyzyň ýaşajyk raýatlary döwlet Baştutanymyzy we ähli ildeşlerimizi Täze ýyl bilen gutladylar. Baýramçylyk aýdymlary we tanslary ýerine ýetirildi.
Hormatly Prezidentimiz Serdar Berdimuhamedow göni ýaýlymda Türkmenistanyň halkyna Täze ýyl Gutlagy bilen çykyş etdi.
Sagadyň dilleri 12-ni görkezende Türkmenistanyň Döwlet senasy ýaňlandy. Baýramçylyk feýerwerki öwşün atdy.
Türkmenistan 2024-nji ýyla ýagşy arzuwlar, ägirt uly maksatlar we ertirki güne ynam bilen gadam basdy.
