29-njy dekabrda geçirilen Türkmenistanyň Ministrler Kabinetiniň giňişleýin mejlisinde Mejlisiň Başlygy Dünýägözel Gulmanowa 2024-nji ýyly «Pähim-paýhas ummany Magtymguly Pyragy» ýyly diýip atlandyrmak barada Mejlisiň kararyny okady.
Milli parlamentiň ýolbaşçysy döwlet Baştutanymyza Halk Maslahatynyň wekillerinden, ýurdumyzyň iri jemgyýetçilik birleşiklerinden, zähmet toparlaryndan we raýatlarymyzdan gelip gowşan teklipleri göz öňünde tutup, geljek ýylyň şygaryny kesgitlemek boýunça ýerine ýetirilen işleriň netijeleri barada maglumat berdi.
Bellenilişi ýaly, şunda 2024-nji ýyly Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygy bilen baglanyşykly atlandyrmak, şeýle hem Gahryman Arkadagymyzyň ýiti zehininden, jöwher paýhasyndan dörän «Pähim-paýhas ummany Magtymguly Pyragy» goşgusyndan ugur alyndy.
Hormatly Prezidentimiz Serdar Berdimuhamedow Mejlis tarapyndan beýan edilen «Pähim-paýhas ummany Magtymguly Pyragy» şygaryny hem-de geljek ýylyň nyşanyny makullady we tassyklady. Bu barada TDH habar berýär.