28-nji dekabrda Türkmenistanyň ministrliklerinde we pudaklaýyn dolandyryş edaralarynda «Arkadag Serdarly bagtyýar ýaşlar ýyly» şygary astynda tamamlanyp barýan 2023-nji ýylyň jemini jemlemäge bagyşlanan dabaraly duşuşyklar geçirildi.
Mälim bolşy ýaly, ondan bir gün öň ýurdumyzyň Söwda-senagat edarasynda tamamlanyp barýan ýylyň özboluşly jemlenmesine öwrülen halkara ylmy-amaly maslahatyň we köpugurly serginiň dabaraly açylyşy boldy. 28-nji dekabrda hormatly Prezidentimiz Serdar Berdimuhamedow bu ýerde guralan sergi bilen tanyşdy.
Sergi bölümleriniň birinde gurluşyk-senagat pudagynda, şol sanda elektroenergetika pudagynda gazanylan üstünlikler görkezilýär.
28-nji dekabrda ministrliklerde we pudaklaýyn dolandyryş edaralarynda şu ýyl ýurdumyzyň dürli ulgamlarynda zähmet çekip, aýratyn tapawutlanan ýaşlara hormatly Prezidentimiziň adyndan gymmat bahaly sowgatlaryň hem-de ministrlikler, pudaklaýyn dolandyryş edaralary tarapyndan sowgatlaryň, Hormat hatlarynyň gowşurylyş dabaralary geçirildi.
Ýaş hünärmenler hormatly Prezidentimiz Serdar Berdimuhamedowa hem-de türkmen halkynyň Milli Lideri, Halk Maslahatynyň Başlygy Gahryman Arkadagymyza tüýs ýürekden hoşallyk bildirip, geljekde hem mähriban Watanymyzyň hemmetaraplaýyn gülläp ösmegi üçin ähli tagallalary etjekdiklerine ynandyrdylar.