Türkmenistanyň Daşary işler ministrliginiň Halkara gatnaşyklary institutynda Gündogaryň beýik şahyry we akyldary Magtymguly Pyragynyň doglan gününiň 300 ýyllygyna bagyşlanan «Magtymguly Pyragynyň döredijiliginde parahatçylyk ýörelgeleri we umumadamzat gymmatlyklary» atly halkara ylmy-amaly maslahat geçirildi diýip, «Türkmenistan: Altyn asyr» internet-neşiri habar berýär.
Duşuşyk Türkmenistanyň, Gyrgyzystanyň, Özbegistanyň, Azerbaýjanyň, Eýranyň, Türkiýäniň, Russiýanyň we Ukrainanyň ýokary okuw mekdepleriniň, diplomatik akademiýalarynyň we merkezleriniň wekilleriniň gatnaşmaklarynda utgaşykly görnüşde geçirildi.
Halkara maslahatyň «Magtymguly Pyragynyň döwletlilik taglymatynyň Garaşsyz we Bitarap Türkmenistanyň milli bähbitlerini üpjün etmekdäki binýatlyk orny», «Magtymgulynyň paýhas-filosofiki we ahlak – edep garaýyşlarynyň terbiýeçilik ähmiýeti», «Magtymguly Pyragynyň döredijilik mirasy adamzat medeniýetiniň genji-hazynasydyr» atly bölümçeleriniň dowamynda Magtymgulynyň döredijiligini öwrenmegiň hem-de wagyz etmegiň möhüm meselelerine garaldy.
Maslahata gatnaşyjylaryň ählisine Türkmenistanyň Daşary işler ministrliginiň Halkara gatnaşyklary institutynyň Magtymguly Pyragynyň doglan gününiň 300 ýyllygy mynasybetli taýýarlan «Magtymguly Pyragynyň umumadamzat ähmiýetli parahatçylyk taglymaty we häzirki zamanyň möhüm meseleleri» atly ylmy makalalaryň ýygyndysy sowgat berildi.
