Gepleşiklerde Türkmenistanyň wekiliýetine Ministrler Kabinetiniň Başlygynyň orunbasary, daşary işler ministri Raşid Meredow ýolbaşçylyk etdi. Diplomat öz çykyşynda iki möhüm meselä – Hazar sebitindäki ekologiýa gün tertibine we energetika hyzmatdaşlygyna ünsi çekdi.
Ekologiýa barada aýdylanda, türkmen tarapy Hazar deňziniň derejesiniň peselmegi bilen baglanyşykly meseläni hemmetaraplaýyn öwrenmegiň, şol sanda bu babatda ýörite iş toparyny döretmegiň zerurdygyny öňe sürýär. Şeýle hem Hazar deňzinde ylmy-barlaglary geçirmek boýunça bäştaraplaýyn Ylalaşygyň taslamasynyň tassyklanmagyny çaltlaşdyrmak hakynda teklip beýan edildi.
Energetika pudagynda Türkmenistan Hazar deňziniň hukuk ýagdaýy hakyndaky Konwensiýada göz öňünde tutulan deňziň düýbünden turbageçirijileri çekmek bilen baglanyşykly maddany iň tiz wagtda durmuşa geçirmäge çagyrýar. Bu sebitiň ähli döwletleriniň bähbitlerine laýyk gelýär, çünki munuň özi energetika howpsuzlygyny we üstaşyr geçiriş mümkinçiliklerine pugtalandyrmaga itergi berer.
Şeýlelikde, Türkmenistan hereket edýän ylalaşyklara we mehanizmlere esaslanmak bilen, Hazar sebitinde özara bähbitli hyzmatdaşlygy pugtalandyrmaga gyzyklanma bildirýär.
