1-nji dekabrda Dubaýda Bütindünýä howa sammitiniň açylyş dabarasy boldy. Oňa BAE-de iş saparynda bolýan hormatly Prezidentimiz Serdar Berdimuhamedow gatnaşdy diýip, TDH habar berýär.
«Dubai EXPO City» toplumynda geçirilen açylyş dabarasynda Birleşen Arap Emirlikleriniň Prezidenti Şeýh Mohammed bin Zaýed Al Nahaýýan we Birleşen Milletler Guramasynyň Baş sekretary Antoniu Guterriş gutlag sözi bilen çykyş etdiler.
Hormatly Prezidentimiz Serdar Berdimuhamedow “COP-28” howa sammitinde eden çykyşynda gün tertibiniň meseleleri boýunça Türkmenistanyň garaýyşlaryny beýan etdi.
Döwlet Baştutanymyz ýurdumyzda BMG-niň howandarlygynda Merkezi Aziýada howanyň üýtgemegi bilen bagly tehnologiýalaryň sebit merkezini döretmek başlangyjyny öňe sürdi.
Şu gün bu belent münberden Türkmenistan Ählumumy metan borçnamasyna goşulýandygyny resmi taýdan beýan edýär diýip, hormatly Prezidentimiz Serdar Berdimuhamedow nygtady.
Döwlet Baştutanymyz şunuň bilen birlikde, ýurdumyzyň borçnamadan gelip çykýan şertleri iş ýüzünde ýerine ýetirmäge gönükdirilen taslamalaryň we maksatnamalaryň çäklerinde halkara guramalar, hyzmatdaş döwletler bilen gündelik hyzmatdaşlygy dowam etdirjekdigini belledi.
Şeýle hem hormatly Prezidentimiz çykyşynda Türkmenistanyň teklip edilýän Howa we saglyk boýunça Jarnamany goldaýandygyny aýtdy.
Türkmenistan howanyň üýtgemegine garşy göreşmek ulgamynda milli Hökümetleriň we ýerli häkimiýetleriň arasynda utgaşykly hereketiň möhümdigini ykrar etmek bilen, Howanyň üýtgemegine garşy göreşmek boýunça belent maksatly, köp derejeli hyzmatdaşlyk üçin “СOP-28” koalisiýasyny döretmek hakyndaky başlangyjy goldamaga taýýardyr diýip, hormatly Prezidentimiz Serdar Berdimuhamedow nygtady.
Şeýle hem döwlet Baştutanymyz Türkmenistanyň milli bähbitlerini nazara alyp, Emirlikler Jarnamasynyň maksatlaryna ýetmek üçin gyzyklanma bildirýän taraplaryň ählisi bilen oba hojalygy, ekologiýa, energetika, maliýe, saglygy goraýyş ulgamlarynda sebit we ählumumy derejede hyzmatdaşlygy mundan beýläk-de pugtalandyrmaga taýýardygyny aýtdy.