Energetika ministriniň orunbasary Serdar Saparowyň ýolbaşçylygyndaky Türkmenistanyň wekiliýeti 28-29-njy noýabrda Tbiliside geçirilen Merkezi Aziýa sebitleýin ykdysady hyzmatdaşlygy (CAREC) maksatnamasynyň çäklerindäki energetika maýa goýum forumyna gatnaşdy diýip, Türkmenistanyň Gruziýadaky ilçihanasy habar berýär.
Forumyň dowamynda sebitde energetikany ösdürmegiň meseleleri, şol sanda täze maýa goýum taslamalary, energetikanyň netijeliligi we gaýtadan dikeldilýän energiýa çeşmeleri boýunça meseleler ara alnyp maslahatlaşyldy.
CAREC maksatnamasyna gatnaşyjylar Türkmenistanyň energetika serişdeleriniň eksportyny artdyrmak we eksport ugurlaryny diwersifikasiýalaşdyrmak boýunça meýilnamalaryna ýokary baha berdiler.
