Türkmenistanyň Hökümetiniň wekiliýeti bilen Täjigistanyň birnäçe ministrlikleriniň we pudaklaýyn dolandyryş edaralarynyň ýolbaşçylarynyň arasynda geçirilen gepleşikleriň dowamynda nebitgaz pudagynda hyzmatdaşlygy ösdürmek we energiýa serişdeleriniň üpjünçiliginiň gerimini giňeltmek meseleleri ara alnyp maslahatlaşyldy diýip, Türkmenistanyň DIM-niň metbugat gullugy habar berýär.
Hususan-da, Türkmenistanyň wise-premýeri Taňryguly Atahallyýewiň we Täjigistanyň Premýer-ministriniň orunbasary Ziýozod Süleýman Rizoiniň arasynda geçirilen duşuşykda Täjigistana iberilýän energiýa serişdeleriniň möçberlerini artdyrmak bilen baglanyşykly meselelere garaldy.
Türkmen wekiliýeti Söwda-ykdysady we ylmy-tehniki hyzmatdaşlyk boýunça bilelikdäki Türkmen-täjik hökümetara toparynyň 12-nji mejlisine gatnaşmak maksady bilen, 27-28-nji noýabrda Duşanbe şäherinde gulluk iş saparynda boldy.
