28-nji noýabrda Türkmenistanyň Söwda-senagat edarasynda Ykdysady hyzmatdaşlyk boýunça hökümetara türkmen-azerbaýjan toparynyň ýedinji mejlisi geçirildi. Oňa gatnaşmak üçin Azerbaýjanyň ykdysadyýet ministri Mikail Jabbarowyň ýolbaşçylygyndaky wekiliýet ýurdumyza geldi. Şol gün Söwda-senagat edarasynda Türkmen-azerbaýjan işewürlik maslahaty geçirildi diýip, TDH habar berýär.
Söwda-ykdysady, nebitgaz we elektroenergetika ulgamlarynda özara gatnaşyklaryň mümkinçiliklerine aýratyn üns çekildi.
Türkmenistanyň daşary işler ministri Raşid Meredow bilen Azerbaýjanyň ykdysadyýet ministri Mikail Jabbarowyň arasynda geçirilen duşuşykda hem türkmen elektrik energiýasyny Azerbaýjana ibermek bilen bagly meseleler ara alnyp maslahatlaşyldy.
Gepleşikleriň dowamynda ýangyç-energetika pudagynda özara hyzmatdaşlyk etmäge aýratyn üns berildi. Hususan-da, Azerbaýjana gaz üpjünçiliginiň häzirki ýagdaýy we onuň geljegi boýunça pikir alşyldy. Şunuň bilen birlikde, Azerbaýjana türkmen elektrik energiýasyny ibermegiň mümkinçilikleri ara alnyp maslahatlaşyldy diýip, türkmen DIM-niň metbugat beýanatynda habar berilýär.
