Türkmen döwlet binagärlik-gurluşyk institutynyň inžener-mehanika fakultetiniň mugallymlary we talyplary Aşgabat şäheriniň Büzmeýin etrabynda ýerleşýän Energetika enjamlaryny abatlaýyş we hyzmat ediş merkeziniň binýadynda okuw sapagyny geçdiler diýip, «Türkmenistan: Altyn asyr» internet neşiri habar berýär.
Şeýle hem institutyň wekilleri ýurduň ähli sebitlerinde gurlan kuwwatly energiýa desgalarynyň esasy enjamlaryny abatlamak üçin döredilen Merkezdäki beýleki önümçilik prosesleri bilen içgin tanyşdylar.
Bu okuw sapagy ýaş hünärmenleriň ugurdaş bilimlerini artdyrmak we çuňlaşdyrmak, amaly endiklerini ösdürmek, hünär başarnyklaryny emele getirmek we energetika pudagyndaky taýýarlyk derejesini ýokarlandyrmak maksady bilen geçirildi.
Türkmenistan Energetika ministrliginiň «Türkmenenergoabatlaýyş» ýöriteleşdirilen önümçilik birleşiginiň Energetika enjamlaryny abatlaýyş we hyzmat ediş merkezi öz ugry boýunça tutuş Merkezi Aziýada ýeke-täk desgadyr diýlip, çeşmede bellenilýär.
