Türkmenistanyň Prezidenti Serdar Berdimuhamedow Daşkentde geçirilen Ykdysady Hyzmatdaşlyk Guramasynyň 16-njy mejlisinde çykyş edip, YHG-nyň ýurtlaryna iberilýän tebigy gazyň hem-de elektrik energiýasynyň möçberini artdyrmaga Türkmenistanyň taýýardygyny aýtdy diýip, TDH habar berýär.
Bu, ilkinji nobatda, täze senagat we oba hojalygy pudaklarynyň kuwwatynyň artmagy, infrastruktura desgalarynyň gurulmagy, bilelikdäki önümçilik taslamalaryna badalga berilmegi boýunça biziň ýurtlarymyzyň barha artýan energetika isleglerini kanagatlandyrmak üçin zerurdyr diýip, Türkmenistanyň Prezidenti belledi.
Döwlet Baştutanymyz Türkmenistanyň birnäçe bilelikdäki iri energetika taslamalaryny öňe sürendigini, olara YHG-nyň käbir ýurtlarynyň hem gatnaşýandygyny nygtady. Hormatly Prezidentimiz Serdar Berdimuhamedow YHG-niň giňişligini öz içine alýan energiýa üpjünçilik ulgamyny döretmek maksady bilen, hyzmatdaş ýurtlary energetika ulgamynda özara işleri giňeltmäge çagyrdy.
Häzirki wagtda bar bolan we geljekde guruljak kuwwatlyklar arkaly YHG-nyň ýurtlaryna iberilýän tebigy gazyň hem-de elektrik energiýasynyň möçberini artdyrmaga Türkmenistan taýýardyr diýip, Türkmenistanyň Prezidenti belledi.
