Türkmenistanyň Balkan welaýatynda 3-nji noýabrda düýbi tutulan kuwwaty 1574 megawat bolan täze elektrik stansiýasy Gazagystana türkmen elektrik energiýasyny ibermek üçin goşmaça mümkinçilik berer. Bu barada türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Gazagystanyň Prezidenti Kasym-Žomart Tokaýew bilen Astana şäherinde geçirilen duşuşygynyň dowamynda belläp geçdi diýip, TDH habar berýär.
Türkmenistanda halk häkimiýetiniň ýokary wekilçilikli edarasynyň ýolbaşçysy täze desganyň Hazar deňziniň kenarynda, türkmen-gazagystan serhedinden, takmynan, 250 kilometrlikde ýerleşjekdigini aýtdy.
Duşuşygyň dowamynda türkmen halkynyň Milli Lideri we Gazagystanyň Prezidenti iki ýurduň arasynda elektrik energetikasy boýunça hyzmatdaşlyk etmegiň amatly mümkinçilikleriniň bardygyny nygtadylar.
