16-njy oktýabrda hormatly Prezidentimiz Serdar Berdimuhamedow Ministrler Kabinetiniň Başlygynyň obasenagat toplumyna gözegçilik edýän orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler bilen bagly meselelere garaldy diýip, TDH habar berýär.
Bellenilişi ýaly, bugdaý ekişini agrotehniki möhletlerde tamamlamak boýunça işler dowam edýär. Şunuň bilen birlikde, pagta ýygymy möwsüminiň depginini artdyrmak, «ak altynyň» hasylyny gysga möhletlerde we zaýasyz ýygnap almak üçin degişli çäreler görülýär, pagtaçylar bilen öz wagtynda hasaplaşyklar geçirilýär.
Hormatly Prezidentimiz häzirki wagtda alnyp barylýan möwsümleýin oba hojalyk işleriniň ähmiýetine ünsi çekdi hem-de bugdaý ekişini, ekiş geçirilen ýerlerde ideg işleriniň talabalaýyklyk ýerine ýetirilmegini, pagta hasylyny bellenen möhletlerde, ýitgisiz ýygnap almak boýunça işleri berk gözegçilikde saklamagy tabşyrdy.
Mundan başga-da, döwlet Baştutanymyz “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna” laýyklykda, şu ýyl açylyp ulanmaga berilmegi göz öňünde tutulýan medeni-durmuş we önümçilik maksatly desgalardaky gurluşyk işlerini berk gözegçilikde saklamak bilen baglanyşykly görkezmeleri berdi.
