13-nji oktýabrda hormatly Prezidentimiz Serdar Berdimuhamedow Garaşsyz Döwletleriň Arkalaşygynyň döwlet Baştutanlarynyň Geňeşiniň nobatdaky mejlisine gatnaşdy we onuň dowamynda çykyş etdi diýip, TDH habar berýär.
Döwlet Baştutanymyz şu günki duşuşygyň GDA-nyň çäklerinde ählumumy we sebit gün tertibiniň ileri tutulýan meseleleri boýunça yzygiderli, köpugurly dialogyň dowamy bolup durýandygyny belläp, döwletleriň Arkalaşygyň formatyndaky özara gatnaşyklarynyň derwaýys meseleler boýunça hyzmatdaşlygy üstünlikli ilerletmek üçin amatly ýagdaýy döretmegiň möhüm şerti bolup durýandygyna ynam bildirdi.
Hormatly Prezidentimiz öz çykyşynda GDA gatnaşyjy ýurtlaryň ählumumy gün tertibiniň möhüm meseleleri boýunça özara hyzmatdaşlygyna degişli bolan birnäçe wajyp başlangyçlary öňe sürdi. Hususan-da, döwlet Baştutanymyz BMG-niň howandarlygynda Ählumumy howpsuzlyk strategiýasyny işläp taýýarlamak mümkinçiliklerini ara alyp maslahatlaşmaga girişmegi teklip etdi.
Türkmenistanyň Prezidentiniň çykyşy resmi metbugatda çap edildi.
Bişkek şäherine iş saparynyň dowamynda Serdar Berdimuhamedow Gyrgyzystanyň Prezidenti Sadyr Žaparow bilen duşuşyk geçirildi. Taraplar dürli ugurlarda, şol sanda söwda-ykdysady, syýasy-diplomatik we medeni-ynsanperwer ulgamlarda ikitaraplaýyn gatnaşyklary ösdürmegiň geljegi barada pikir alyşdylar.
Ýokary derejeli duşuşygyň öňüsyrasynda, 12-nji oktýabrda Türkmenistanyň wekiliýeti Bişkek şäherinde geçirilen Garaşsyz Döwletleriň Arkalaşygynyň Daşary işler ministrleriniň Geňeşiniň nobatdaky mejlisine gatnaşdy.
