4-nji sentýabrda hormatly Prezidentimiz Serdar Berdimuhamedow Ministrler Kabinetiniň Başlygynyň obasenagat toplumyna gözegçilik edýän orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi diýip, TDH habar berýär.
Döwlet Baştutanymyz 6-njy sentýabrda bugdaý ekişine we pagta ýygymy möwsümine başlamak üçin görülýän taýýarlyk hem-de beýleki möwsümleýin oba hojalyk işleri baradaky hasabatlary diňledi. Bu möhüm möwsümleri ýokary guramaçylykly geçirmek boýunça görkezmeler berildi we olary dabaraly ýagdaýda başlamak tabşyryldy.
Hormatly Prezidentimiz Serdar Berdimuhamedow işgärleri wezipä belledi. Şeýlelik bilen, döwlet Baştutanymyz B.Ataýewi hem-de G.Ataýewi oba hojalyk ministriniň orunbasary wezipelerine, N.Jumaşowy we B.Miminowy daşky gurşawy goramak ministriniň orunbasary wezipelerine bellemek hakynda resminamalara gol çekdi.
Şeýle hem hormatly Prezidentimiz, özüne ynanylan wezipäni oňarmandygy üçin, D.Baýlyýewi «Türkmen atlary» döwlet birleşiginiň baş direktorynyň orunbasary wezipesinden boşadyp, bu wezipä E.Babalyýewi belledi.
Ýurdumyzyň käbir welaýatlarynyň etrap häkimliklerinde hem wezipä bellemek boýunça işler geçirildi, hususan-da, etrap häkimlikleriniň ýolbaşçylarynyň orunbasarlarynyň birnäçesi wezipä bellenildi we wezipesinden boşadyldy.
