26-njy awgustda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäheriniň gurluşygynyň ikinji tapgyrynda bina edilmegi meýilleşdirilýän desgalaryň taslamalary bilen tanyşdy we olaryň işini döwrebap derejede alyp barmak bilen baglanyşykly meselelere bagyşlanan iş maslahatyny geçirdi diýip, TDH habar berýär.
Gahryman Arkadagymyz bu ýerde görkezilýän taslamalar bilen tanyşlygyň dowamynda şäheriň muzeýiniň we Baş metjidiniň daşky görnüşlerine, şeýle hem Köpetdagyň belent gerişleriniň birinde ýerleşdirilmegi meýilleşdirilýän Arkadag şäheriniň adynyň ýazgysynyň görnüşlerine degişli birnäçe belliklerini aýtdy. Gahryman Arkadagymyz olary synlap, ýazgynyň uzaklardan görünmelidigini, onuň göze gelüwli, özüne çekiji bolmalydygyny, aýratyn-da, ýazgynyň yşyklandyryş ulgamyna häzirki zamanyň ösen tejribesine laýyklykda çemeleşilmelidigini belledi.
Türkmen halkynyň Milli Lideri taslamalar boýunça gurluşyk babatda öz baý tejribesine salgylanyp, desgalarda we beýleki ýerlerde ýerleşdirilýän ýazgylara, göze gelüwli we döwrebap görnüşde boljak gijeki yşyklandyryş ulgamyna degişli birnäçe maslahatlaryny berdi diýlip, çeşmede bellenilýär.
