«Kazan Digital Week» 20-22-nji sentýabr aralygynda Tatarstanyň paýtagtynda geçiriler. Halkara forumyň wezipesi – ylmy-tehniki maglumatlaryň alyş-çalşygy boýunça hyzmatdaşlyk etmekden, importyň ornuny tutmak we importdan öňe geçmek meselelerini netijeli çözüp biljek ylmy-tehnologik serişdeleri birleşdirmekden ybaratdyr.
Halkara çärä gatnaşmak üçin eýýäm 3,3 müňden gowrak adam hasaba alyndy. Türkmenistandan iki gatnaşyjy hasaba alyndy. Gatnaşyjylary hasaba alyş işleri 19-njy sentýabra, sagat 12:00-a çenli dowam eder.
KDW – 2023-iň maksatnamasy sergini, umumy mejlisleri, iş bölümlerini, tegelek stollary, tehniki saparlary, çekişmeleri, ussatlyk sapaklaryny we giň gerimli medeni maksatnamany öz içine alýar. Çäreler mowzuklaýyn ugurlara görä düzülendir: intellektual ulag ulgamlary; döwlet dolandyryş ulgamynda sanly tehnologiýalar; sanly senagat 4.0; täze döwrüň kiberhowpsuzlygy; finteh ekoulgamy; işewürlige ornaşdyrylan täzelikler; saglygy goraýyş we lukmançylyk, bilim, medeniýet, oba hojalygy pudaklaryndaky sanly tehnologiýalar.
