«Türkmenenergo» döwlet elektroenergetika korporasiýasynyň resmi işgärleri Owganystanyň «DABS» energetika kompaniýasynyň wekilleri bilen Hyrat welaýatynyň «Nur al-Jihad» bekedine elektrik energiýasyny ibermek taslamasynyň tehniki meselelerini ara alyp maslahatlaşdylar diýip, «Orient» «ariananews.af» saýtyna salgylanyp habar berýär.
Duşuşygyň dowamynda taraplar energetika pudagyndaky bilelikdäki taslamalary gözden geçirdiler, resminamalaryň taýýarlanylyşyna, üpjünçiligi durmuşa geçirmegiň howpsuzlyk, ätiýaçlandyryş we tehniki meselelerine garadylar. Owganystanyň öňdebaryjy energetika kompaniýasy öz beýanynda "Nur al-Jihad" bekedine elektrik togyny ibermek taslamasynyň ýurduň demirgazyk-günbatar böleginiň energiýa meselelerini çözjekdigini we «DABS-yň» onuň tiz durmuşa geçirilmegini goldaýandygyny belledi.
Maýadarlaryň birnäçesi Hyradyň Owganystanyň senagat welaýatydygyny we esasy merkezleriniň biridigini nygtaýarlar, şonuň üçin hem türkmen elektrik energiýasynyň eksportyny artdyrmak sebitde önümçiligi ýokarlandyrmagyna ýardam eder diýlip, çeşmede bellenilýär.
