4-nji awgustda türkmen paýtagtynda Türkmenistanyň, Täjigistanyň we Özbegistanyň döwlet Baştutanlarynyň ilkinji üçtaraplaýyn sammiti geçirildi we onuň netijeleri boýunça Bilelikdäki Beýannama kabul edildi diýip, TDH habar berýär.
Resminamada Türkmenistanyň Prezidenti Serdar Berdimuhamedowyň, Täjigistanyň Prezidenti Emomali Rahmonyň we Özbegistanyň Prezidenti Şawkat Mirziýoýewiň aralarynda geçirilen duşuşygyň dowamynda ara alnyp maslahatlaşylan sebitleýin hyzmatdaşlygyň möhüm meseleleri öz beýanyny tapdy.
Döwlet Baştutanlary nebitgaz we elektrik energiýasy pudaklarynda özara hyzmatdaşlygy berkitmek hakynda ylalaşdylar. Muny Bilelikdäki Beýannamanyň 6-njy bendi hem subut edýär:
«Taraplar energetika pudagynda hyzmatdaşlygy ösdürmegiň möhümdigini belläp, tebigy gazy, nebiti we nebit önümlerini, elektrik energiýasyny ibermek babatda hyzmatdaşlygyň aýratyn ähmiýetini nygtadylar.
Şunuň bilen baglylykda, taraplar energetika babatda üçtaraplaýyn hyzmatdaşlygyň oňyn tejribesine daýanyp, nebitgaz hem-de elektrik energetikasy pudaklarynda bilelikde işlemegiň mümkinçiligine seretmek maksady bilen, 2023-nji ýylyň ikinji ýarymynda energetika pudagynyň edaralarynyň ýolbaşçylarynyň derejesinde gepleşikleri geçirmek barada ylalaşdylar».
