Türkmenistanyň Prezidenti Serdar Berdimuhamedow 19-njy iýulda «Merkezi Aziýa – Aýlagdaky arap döwletleriniň hyzmatdaşlyk geňeşi» görnüşindäki Sammitinde çykyş edip, AADHG + MA görnüşinde hyzmatdaşlyk boýunça birnäçe teklipleri öňe sürdi, şol sanda ulag we energetika ugurlarynda hyzmatdaşlygy ösdürmegi nygtady.
Döwlet Baştutanynyň belleýşi ýaly, bu ugurlar boýunça hyzmatdaşlygy ösdürmek üçin ilkinji nobatda Merkezi Aziýany we Aýlagdaky arap döwletlerini birleşdirmek maksady bilen, täze ulag-üstaşyr geçelgeleri, berk we ygtybarly logistika infrastrukturasyny döretmek wajypdyr.
Şeýle hem Türkmenistanyň Prezidenti energetika pudagyna hem giň orun berýändigimize we Sammite gatnaşyjy ýurtlarda baý energiýa çeşmeleriniň, ýangyç-energetika serişdeleriniň we olary gaýtadan işleýän güýçli önümçilik desgalarynyň bardygyna aýratyn üns çekdi.
«Energetika pudagynda bilelikdäki hereketleriň mümkinçiliklerini seljermek we maslahat bermek işlerini alyp barjak Energetika boýunça bilelikdäki iş toparyny döretmegi teklip edýäris» – diýip, hormatly Prezidentimiz Serdar Berdimuhamedow belledi.
