Türkmen paýtagtynda «Berkarar döwletiň täze eýýamynyň Galkynyşy döwründe ylym, tehnika we innowasion tehnologiýalar» atly halkara ylmy maslahat öz işine başlady. Giňden bellenilýän Ylymlar güni mynasybetli geçirilýän bu forum ýurdumyzda ylym-bilim ulgamyny ösdürmek meseleleriniň hemişe üns merkezinde saklanylýandygynyň nobatdaky subutnamasy boldy diýip, TDH habar berýär.
Foruma Türkmenistanyň Ylymlar akademiýasynyň ugurdaş institutlaryndan, ýokary okuw mekdeplerinden alymlar, mugallymlar we ýaş oýlap tapyjylar bilen birlikde, Azerbaýjanyň, Ermenistanyň, Belarusuň, Wýetnamyň, Russiýanyň, Koreýa Respublikasynyň, Täjigistanyň, Türkiýäniň, Ýaponiýanyň we beýleki ýurtlaryň ylmy edaralarynyň wekilleri gatnaşdylar.
Oguz han adyndaky Inžener-tehnologiýalar uniwersitetinde halkara maslahatyň açylyş dabarasy geçirildi. Ylmy forumyň bölümler boýunça mejlisleri dürli ugurlardaky ylmy barlaglara bagyşlandy.
Ýagşygeldi Kakaýew adyndaky Halkara nebit we gaz uniwersitetinde nanotehnologiýalar, himiki tehnologiýalar, täze materiallary öwrenmek we energetika meseleleri boýunça mejlis geçiriler. Bu bölümiň çykyşlarynda köp sanly döwletleriň ylmy-barlag we tejribe-maslahat merkezlerinde üstünlikli durmuşa geçirilen taslamalara, şol sanda ekologik taýdan howpsuz çig mal serişdeleriniň işlenilişi, nebitgaz, himiýa, energetika we beýleki ugurlaryň ylmy-önümçilik taýdan enjamlaşdyrylyşyna garalar.
