10-njy iýunda hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda şu ýylyň bäş aýynda ykdysadyýetimiziň pudaklarynda alnyp barlan işleriň jemleri jemlenildi, resminamalaryň taýýarlanan taslamalaryna garaldy we döwlet durmuşynyň käbir meseleleri ara alnyp maslahatlaşyldy diýip, TDH habar berýär.
Ministrler Kabinetiniň Başlygynyň orunbasary B.Annamämmedow gözegçilik edýän gurluşyk-senagat toplumynyň edara-kärhanalarynda ýerine ýetirilen işleriň jemleri barada hasabat bermek bilen, Energetika ministrliginde alnyp barylýan işler barada maglumat berdi.
Habar berlişi ýaly, Energetika ministrligi önümleri öndürmegiň, işleri ýerine ýetirmegiň we hyzmatlaryň meýilnamasyny 110,1 göterim berjaý etdi. Elektrik energiýasyny öndürmegiň ösüş depgini 105,8 göterime, ony eksport etmegiň ösüş depgini 106,3 göterime deň boldy.
