7-nji iýunda Türkmenistanyň Döwlet ministri – «Türkmengaz» döwlet konserniniň başlygy Maksat Babaýewiň, Türkmenistanyň Energetika ministriniň orunbasary Annageldi Jepbarowyň ýolbaşçylygyndaky Türkmenistanyň wekiliýeti TOPH gaz geçirijisiniň we TOP elektrik geçirijisiniň taslamalarynyň durmuşa geçirilişini ara alyp maslahatlaşmak maksady bilen, iki günlük iş sapar bilen Yslamabat şäherine geldi diýip, türkmen daşary syýasat edarasy habar berýär.
Päkistanyň Energiýa ministrliginde geçirilen duşuşygyň dowamynda taraplar ýangyç-energetika pudagynda ikitaraplaýyn hyzmatdaşlygyň birnäçe meselelerini, aýratyn-da Türkmenistan – Owganystan – Päkistan – Hindistan (TOPH) gaz geçirijisiniň, Türkmenistan – Owganystan – Päkistan (TOP) ugry boýunça elektrik geçiriji liniýasynyň we optiki-süýmli aragatnaşyk liniýasynyň durmuşa geçirilişi barada maslahatlaşdylar. Taraplar TOPH taslamasynyň iş ýüzünde durmuşa geçirilmegi babatynda möhüm işleriň ýerine ýetirilendigi bellediler.
Päkistan tarapy TOPH we TOP taslamalarynyň sebitiň durmuş-ykdysady taýdan gülläp ösmegi we Päkistanda energiýa howpsuzlygyny we ykdysady ösüşi gazanmakda ähmiýetini belläp, Päkistanyň hökümetiniň bu taslamalary doly goldaýandygyny nygtady. TOP elektrik geçirijisiniň TOPH gaz geçirijisine parallel çekiljekdigi, munuň bolsa diňe bir gaz geçirijisini we onuň desgalaryny elektrik energiýa bilen üpjün etmän, eýsem, Päkistanyň içerki islegini kanagatlandyrmakda we elektrik energiýasynyň çykdajylaryny azaltmakda möhüm orun eýeläp biljekdigi bellenildi.
