Türkmen halkynyň Milli Lideri Eýran Yslam Respublikasyna amala aşyran iş saparynyň çäklerinde 31-nji maýda Eýranyň onlarça kompaniýany özünde jemleýän «Mapna Group» senagat toplumyna baryp gördi. Bu barada TDH habar berýär.
Bu ýerde Milli Liderimiziň dykgatyna kompaniýalaryň işini utgaşdyrýan senagat toplumynyň köpugurly ýola goýýan işi, şol sanda elektroenergetika pudagynda alyp barýan taslamalary barada giňişleýin maglumat berýän tanyşdyryjy wideorolik hödürlendi.
Hususan-da, kompaniýalar toparynyň iş çygrynda energetika desgalarynyň taslamasyny düzmek we olary gurmak, esasy we kömekçi enjamlary öndürmek, şol sanda elektrik energiýasyny işläp çykarmak üçin utgaşykly enjamlary öndürmek işleri ýerine ýetirilýär. Bulardan başga hem, «Mapna Group» senagat toplumy ulag ulgamlaryny ulanmak we olara tehniki hyzmat etmek, bu ulgamlary elektrikleşdirmek işlerini alyp barýar.
