1-nji iýunda Ýer ýüzüniň ähli ýurtlarynda bolşy ýaly, Türkmenistanda hem Çagalary goramagyň halkara güni giňden bellenip geçilýär. Bu baýramçylyk mynasybetli hormatly Prezidentimiz Serdar Berdimuhamedow ýurdumyzyň ähli bagtyýar çagalaryny we halkymyzy mähirli gutlady.
«Çagalar biziň kalbymyzyň buýsanjy, öýlerimiziň ýaraşygy, bagtyýar durmuşymyzyň gül-gunçalary, ömrümiziň dowamatydyr. Şoňa görä-de, ýurdumyzda erkana ýaýnaýan bagtyýar çagalarymyzyň rahat dynç alyp, okap, öwrenip, döredip, ylymly-bilimli, giň dünýägaraýyşly, sagdyn bedenli, edep-terbiýeli, Watana wepaly bolup ýetişmeklerine gönükdirilen maksatnamalarymyzy üstünlikli amala aşyrýarys» diýlip, döwlet Baştutanymyzyň TDH-niň resmi saýtynda neşir edilen Gutlag hatynda beýan edilýär.
