29-njy maýda hormatly Prezidentimiz Serdar Berdimuhamedow sanly ulgam arkaly nobatdaky iş maslahatyny geçirdi. Onda ýurdumyzyň oba hojalyk toplumynda hem-de sebitlerde alnyp barylýan işleriň barşy bilen bagly meselelere garaldy diýip, TDH habar berýär.
Ministrler Kabinetiniň Başlygynyň obasenagat toplumyna gözegçilik edýän orunbasary A.Ýazmyradow hem-de welaýatlaryň häkimleri bu meseleler boýunça alnyp barylýan işler barada hasabat berdiler.
Şeýle-de Çagalary goramagyň halkara gününi, Bütindünýä welosiped gününi, Daşky gurşawy goramagyň bütindünýä gününi bellemäge taýýarlyk işleri hem-de Oba milli maksatnamasyna laýyklykda, şu ýyl açylyp ulanmaga berilmegi meýilleşdirilýän dürli maksatly desgalardaky gurluşyk işleriniň barşy barada hasabat berildi.
Hormatly Prezidentimiz galla oragynyň üstünlikli geçirilmeginiň möhüm wezipe bolup durýandygyny belläp, welaýatlarda il sylagly ýaşulularyň gatnaşmagynda galla oragyna başlamak dabarasynyň ýokary guramaçylyk derejesiniň üpjün edilmegini häkimlere tabşyrdy.
