Şu gün Türkmenistanda Milli bahar baýramy – Halkara Nowruz güni giň gerimde bellenilip geçilýär. Şanly waka mynasybetli esasy baýramçylyk dabaralary Ahal welaýatynyň Ak bugdaý etrabyndaky «Nowruz ýaýlasy» meýdançasynda ýaýbaňlandyryldy.
Hormatly Prezidentimiz Serdar Berdimuhamedow Garaşsyz, hemişelik Bitarap Türkmenistanyň ähli halkyna iberen baýramçylyk Gutlagynda Nowruzyň jebisleşdiriji ähmiýeti barada nygtap geçmek bilen, Milli bahar baýramy mynasybetli geçirilýän toý-baýramlaryň bagtyýar watandaşlarymyzy ata Watanymyzyň has-da gülläp ösmeginiň bähbidine belent maksatlara ruhlandyrjakdygyna, asyrlardan şu günlere gelip ýeten milli däp-dessurlarymyzy, edim-gylymlarymyzy, baý medeni mirasymyzy giňden wagyz etmekde möhüm ähmiýete eýe boljakdygyna berk ynam bildirdi.
