27-nji fewralda hormatly Prezidentimiz Serdar Berdimuhamedow Ministrler Kabinetiniň Başlygynyň obasenagat toplumyna gözegçilik edýän orunbasary A.Ýazmyradowyň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi diýip, TDH habar berýär.
Iş maslahatynyň gün tertibine ýurdumyzda alnyp barylýan möwsümleýin oba hojalyk işleri bilen baglanyşykly meseleler girizildi.
Döwlet Baştutanymyz hasabatlary diňläp, bugdaý meýdanlarynda geçirilýän ideg işlerini, gowaça ekiljek ýerleri ekişe taýýarlamak, welaýatlaryň maldarçylyk hojalyklarynda owlak-guzy möwsümini guramaçylykly geçirmek boýunça işleri gözegçilikde saklamagyň wajypdygyna ünsi çekdi.
Hormatly Prezidentimiz ýurdumyzda ýazky bag ekmek möwsüminde ekiljek saýaly, pürli, miweli baglaryň, üzümiň nahallaryny, olaryň ekiljek ýerlerini taýýarlamak babatda degişli tabşyryklary berdi.
