Türkmenistan özbek hyzmatdaşlary bilen bilelikde energiýa serişdeleriniň iberilmegini ep-esli artdyrmak hem-de olaryň üstaşyr geçirilmegini giňeltmek üçin mümkinçiliklere garamaga taýýardyr. Bu barada hormatly Prezidentimiz Serdar Berdimuhamedow özbek kärdeşi Şawkat Mirziýoýew bilen Aşgabatda geçirilen gepleşikleriň dowamynda belledi diýip, «Türkmenistan: Altyn asyr» saýty habar berýär.
«Energetika ulgamynda hyzmatdaşlygy dowam etdirmäge we ösdürmäge bil baglaýarys. Biziň umumy işlerimiziň hatarynda durmuşa geçirilen iri energetika taslamasy — Türkmenistan — Özbegistan — Gazagystan — Hytaý gaz geçirijisi bar» – diýip, Türkmenistanyň Prezidenti nygtady.
Döwlet Baştutanymyz Özbegistan — Türkmenistan — Hazar deňzi — Gara deňziniň portlarynyň üsti bilen Ýewropa çykmak arkaly, ulag ugurlaryny ösdürmek boýunça bilelikde işlemäge Türkmenistanyň taýýardygyny tassyklady.
