14-nji oktýabrda hormatly Prezidentimiz Serdar Berdimuhamedow GDA-nyň döwlet Baştutanlarynyň Geňeşiniň nobatdaky mejlisine hem-de «Merkezi Aziýa — Russiýa» sammitine gatnaşmak üçin, şeýle-de doganlyk ýurda döwlet saparyny amala aşyrmak maksady bilen, Gazagystan Respublikasyna ugrady diýip, TDH habar berýär. Garaşsyz Döwletleriň Arkalaşygyna gatnaşýan ýurtlaryň Liderleri köptaraplaýyn söwda-ykdysady gatnaşyklary ösdürmek, ynsanperwer ulgamda hyzmatdaşlygy giňeltmek bilen bagly möhüm meseleler boýunça pikir alyşdylar. GDA-nyň döwlet Baştutanlarynyň Geňeşiniň mejlisinde dürli ugurlarda hyzmatdaşlygy ösdürmäge gönükdirilen çözgütleriň birnäçesi kabul edildi. GDA-nyň Ýerine ýetiriji komitetine sammitde beýan edilen, Arkalaşygyň çäklerinde özara gatnaşyklary kämilleşdirmäge gönükdirilen möhüm başlangyçlary seljermek hem-de olary durmuşa geçirmek boýunça anyk çäreleri işläp taýýarlamak teklip edildi. «Merkezi Aziýa — Russiýa» sammitiniň jemleri boýunça Ýewraziýa giňişliginde sebit hyzmatdaşlygynyň möhüm meselelerini öz içine alýan döwlet Baştutanlarynyň Bilelikdäki Beýannamasy kabul edildi. Hormatly Prezidentimiz Serdar Berdimuhamedow öz çykyşynda Türkmenistanyň GDA-nyň çäklerinde geljekde hem ýakyn özara hyzmatdaşlygy berkitmäge pugta eýerýändigini tassyklamak bilen, bilelikdäki hyzmatdaşlygyň geljegine uly ynam bildirdi we birnäçe başlangyçlary öňe sürdi. Hormatly Prezidentimiz Serdar Berdimuhamedowyň Gazagystan Respublikasyna sapary dowam edýär.
