16-njy sentýabrda Samarkantda geçirilen Şanhaý Hyzmatdaşlyk Guramasynyň mejlisine hormatly Prezidentimiz Serdar Berdimuhamedow çykyş edip, Türkmenistanyň energetika ulgamynda ŞHG bilen yzygiderli we uzak möhletleýin hyzmatdaşlyga taýýardygyny belledi.
Döwlet Baştutanymyz gurama agza ýurtlaryň zerurlyklaryny üpjün etmek, geljekde daşarky bazarlara çykmak maksady bilen, energiýa serişdeleriniň iberilişini diwersifikasiýalaşdyrmak boýunça bilelikdäki taslamalary meýilleşdirmäge iş ýüzünde girişmäge teklibini beýan etdi. «Bu ulgamda köp ýyllaryň dowamynda halkara hyzmatdaşlygyň baý tejribesini toplan ýurdumyz energiýa serişdelerini ibermegiň möçberlerini ep-esli artdyrmak üçin zerur serişde kuwwatlyklaryna eýedir» diýip, Türkmenistanyň Prezidenti nygtady.
Türkmenistanyň Prezidentiniň ŞHG-niň sammitinde eden çykyşynyň doly ýazgysy TDH-nyň saýtynda köpçülige ýetirildi.
