3-nji sentýabrda Milli Geňeşiň Halk Maslahatynyň Başlygy, Hormatly il ýaşulusy Gurbanguly Berdimuhamedow Mary welaýatyna iş saparynyň çäklerinde Türkmenistanyň Döwlet energetika institutyna bardy diýip, TDH habar berýär.
Bu ýerde Gahryman Arkadagymyz institutyň eýwanynda ýaýbaňlandyrylan serginiň gymmatlyklary bilen tanyşdy. Institutyň rektory bu ýokary okuw mekdebiniň 25 ýylyň dowamynda geçen ýoly, gazanan üstünlikleri, şeýle-de talyplaryň dürli derejedäki ders bäsleşiklerinde mynasyp bolan diplomlary we degişli resminamalar barada giňişleýin maglumat berdi.
Gahryman Arkadagymyz ýurdumyzda energetika pudagynyň ösüş taryhynyň Murgap derýasynda 1,2 megawat kuwwaty bolan Hindiguş gidroelektrik stansiýasynyň gurulmagy bilen başlanýandygyny belledi. «Ol öz döwründe Ýewraziýa sebitiniň agramly bölegindäki iň kuwwatly elektrik stansiýasy bolupdyr. Dünýäde şonuň ýaly 110 ýyla golaý taryhy bolan, başda oturdylan enjamlary bilen işläp duran elektrik stansiýasy başga ýokdur. Ony «tehniki pikiriň ýadygärligi» diýip atlandyrmak mümkin. «Özboluşly muzeý» diýip atlandyrsagam bolýar» - diýip, hormatly Arkadagymyz Gurbanguly Berdimuhamedow aýtdy.
Şeýle hem Milli Geňeşiň Halk Maslahatynyň Başlygy geljegi uly energetika taslamalary we olary durmuşa geçirmekde ýaşlaryň orny hakynda aýtdy.
Şu ýylyň 12-nji awgustynda bu institutyň döredilenine 25 ýyl boldy, alym Arkadagymyz hemmeleri bu şanly sene bilen gutlady.
