30-njy iýunda Azerbaýjan Respublikasynyň paýtagty Baku şäherinde Goşulyşmazlyk Hereketiniň Parlament torunyň «Ählumumy parahatçylygya we durnukly ösüşe ýardam etmekde milli parlamentleriň ornuny ýokarlandyrmak» atly maslahaty öz işine başlady. Türlmenistanyň Milli Geňeşiniň wekiliýeti bu maslahatyň işine we onuň çäklerinde geçiriljek çärelere we duşuşyklara gatnaşýar diýip, «Türkmenistan: altyn asyr» saýty habar berýär.
Bu forumy geçirmek başlangyjy geçen ýylyň güýzünde Parlamentara birleşmäniň 143-nji Assambleýasynyň çäklerinde Goşulyşmazlyk Hereketiniň Başlygy, Azerbaýjanyň Prezidenti Ilham Aliýew tarapyndan öňe sürlüpdi. Goşulyşmazlyk Hereketine gatnaşyjy döwletleriň parlamentleriniň başlyklarynyň, wise-başlyklarynyň we deputatlarynyň gatnaşmaklarynda geçirilen mejlisde Parlament tory döredilip, ol Hereketiň taryhynda täze sahypany açar we parlamentara gatnaşyklary ösdürmäge ýardam eder.
Bakuda geçirilýän häzirki duşuşykda GH-niň PT-niň Iş ugurlaryny, resmi nyşanyny we baýdagyny tassyklamak, şeýle hem Baku jarnamasyny kabul etmek, Toruň başlygyny we Başlygynyň orunbasarlaryny saýlamak göz öňünde tutulýar. Wekiliýetleriň ýolbaşçylarynyň Azerbaýjanyň döwlet işgärleri bilen duşuşyklarynyň meýilleşdirilýär.
