«Türkmenistanyň nebiti we gazy» (OGT-2022) halkara konferensiýasynda BMG-niň Merkezi Aziýa boýunça Baş sekretarynyň ýörite wekili, BMG-niň Merkezi Aziýa üçin Öňüni alyş diplomatiýasy boýunça sebit merkeziniň başlygy Natalýa German çykyş etdi. Bu barada «Turkmenportal» web saýty habar berýär.
Öz çykyşynda ol bu forumyň ýüze çykýan meseleleri we kynçylyklary ara alyp maslahatlaşmak hem-de sebitiň energetika howpsuzlygyny üpjün etmekde Türkmenistanyň işjeň ornuny mundan beýläk-de goldamak üçin amatly mümkinçilikdigini aýtdy.
«Işewür jemgyýetiň agzalary hökmünde energetikanyň milli we sebit howpsuzlygy, parahatçylyk we global durnuklylyk meselesidigini has gowy bilýärsiňiz. Ol geosyýasatyň özeni bolup durýar, şonuň üçin hem energetika — baýlyk we güýç meselesidir, bu bolsa onuň gapma-garşylygyň hem, edil şonuň ýaly hyzmatdaşlygyň hem çeşmesi bolup bilýändigini aňladýar. Merkezi Aziýada ol onýyllyklaryň dowamynda hyzmatdaşlygyň çeşmesi bolup durýar we muny diňe berkitmek gerek» — diýip, sebit merkeziniň başlygy belledi.
Şeýle hem Türkmenistanyň milli we köptaraplaýyn derejede özara hyzmatdaşlygy hem-de ykdysady ösüşi pugtalandyrmak üçin köp wagt sarp edýändigini we muňa aýratyn üns berýändigi bellenildi. Ýurduň energetika we ulag diplomatiýasy babatdaky işjeň orny Birleşen Milletler Guramasynyň Baş Assambleýasy tarapyndan soňky ýyllarda Türkmenistanyň öňe süren teklipleriniň esasynda degişli kararlaryň kabul edilmegi bilen tassyklanyldy.
BMG-niň Baş sekretarynyň ýörite wekili öz çykyşynda Türkmenistanyň sebitara söwdany giňeltmek boýunça möhüm sebit başlangyçlaryny öňe sürmek ugrundaky tagallalaryna ünsi çekdi, şeýle hem howanyň üýtgemegi meselesini gozgady.
