Türkmenistan Pakistan bilen söwda-ykdysady gatnaşyklary mundan beýläk hem ösdürmegi we bu ugurda Bilelikdäki hökümetara türkmen-pakistan toparynyň işini güýçlendirmegi, şeýle-de şu ýylyň dowamynda Yslamabatda bu toparyň nobatdaky mejlisini geçirmegi teklip edýär. Bular barada 22-nji martda Türkmenistanyň daşary işler ministriniň wezipesini wagtlaýyn ýerine ýetiriji Raşid Meredow bilen onuň pakistanly kärdeşi Şah Mahmud Kureşiň arasynda geçirilen ikitaraplaýyn duşuşykda aýdyldy. Duşuşyk Yslamabat şäherinde geçirildi.
Türkmenistanyň Daşary işler ministrliginiň resmi web saýtynda ýazylyşy ýaly, ministriň wezipesini wagtlaýyn ýerine ýetiriji Raşid Meredow Pakistan Yslam Respublikasy bilen gatnaşyklaryň Türkmenistanyň daşary syýasatynyň ileri tutulýan ugurlarynyň biri bolup durýandygyny belledi. Pakistan Türkmenistan bilen diplomatik gatnaşyklaryny ýola goýan ilkinji döwletleriň biri bolup (1992-nji ýylyň 9-njy maýy), Türkmenistanyň Bitaraplygyny hem işjeň goldady.
Diplomatlar bilelikdäki iri taslamalaryň, şol sanda TOPH gaz geçirijisiniň, TOP elektrik geçirijisiniň we optiki-süýmli aragatnaşyk ulgamynyň taslamalarynyň durmuşa geçirilişini jikme-jik ara alyp maslahatlaşdylar.
