Türkmenistan Özbegistanyň we Eýranyň üsti bilen üçünji ýurda elektrik energiýasynyň eksportyny artdyrmak isleýär. Türkmen telewideniýesiniň «Watan» habarlar gepleşiginiň habar bermegine görä, bu barada Prezident Gurbanguly Berdimuhamedow şu gün Daşoguz welaýatyna bolan iş saparynyň dowamynda belläp geçdi.
«Häzirki wagtda türkmen elektrik energiýasy goňşularymyz bolan Eýran Yslam Respublikasyna we Owganystana, Özbegistan hem-de Gyrgyz Respublikalaryna iberilýär. Şonuň ýaly-da, ony Özbegistanyň hem-de Eýranyň üsti bilen üçünji ýurtlara-da ibermegiň mümkinçiligi uly bolup durýar» diýip, Prezident Gurbanguly Berdimuhamedow sözüni dowam etdi.
Bu beýannama “Türkmenistanyň elektrik energetikasy pudagyny ösdürmegiň 2013 — 2020-nji ýyllar üçin Konsepsiýasynyň” durmuşa geçirilişiniň seljermesi esasynda ýerine ýetirildi.
Bellenilişi ýaly, Konsepsiýanyň üstünlikli amala aşyrylmagy netijesinde häzirki döwürde welaýatlaryň hersinde iki-üç sany elektrik stansiýasynyň hereket edýändigini aýdyp, döwlet Baştutany onuň sebitleriň energiýa howpsuzlygyny üpjün etmäge, pudagyň kuwwatyny ýokarlandyrmaga giň mümkinçilikleri döredýändigini belledi.
