Türkmenistanyň energetika ministri Annageldi Saparow we Russiýa Federasiýasynyň energetika ministri Sergeý Siwilýow Kazanda geçirilen «Energoprom-2026» elektroenergetika forumynyň çäklerinde gepleşikler geçirdi. Bu barada Türkmenistanyň Russiýadaky ilçihanasy habar berdi.
Taraplar ikitaraplaýyn energiýa gepleşikleriniň geljegini, şol sanda energetika infrastrukturasyny döwrebaplaşdyrmak, energiýa ulgamlarynyň ygtybarlylygyny ýokarlandyrmak we gaýtadan dikeldilýän energetika ýaly öňdebaryjy tehnologiýalary ornaşdyrmak ulgamynda bilelikdäki taslamalary durmuşa geçirmegiň mümkinçiliklerini ara alyp maslahatlaşdylar.
A.Saparow forumda Türkmenistanyň wekilýetine ýolbaşçylyk edýär. Çärä Russiýanyň we daşary ýurtlaryň döwlet hem-de jemgyýetçilik işgärleri, Garaşsyz Döwletleriň Arkalaşygyna agza ýurtlaryň energetika ministrleri, degişli edaralaryň wekilleri, iri energetika kompaniýalarynyň ýolbaşçylary hem-de öndürijiler gatnaşýarlar.
Forumyň çäklerinde GDA-nyň Elektroenergetika geňeşiniň mejlisi geçirildi, oňa gatnaşyjylar energiýa ulgamlaryny sazlaşdyrmak, ýangyç-energetika toplumyny ösdürmek, sanlarylaşdyrmak we energetika infrastrukturasynyň ygtybarlylygyny ýokarlandyrmak meselelerine seretdiler.
Türkmenistan daşary ýurtly hyzmatdaşlar, halkara guramalar we dünýäniň öňdebaryjy kompaniýalary bilen hyzmatdaşlygy ösdürip, iň täze tehnologiýalaryň hem-de ylmyň gazananlarynyň esasynda milli ykdysadyýeti döwrebaplaşdyrmaga we diwersifikasiýalaşdyrmaga ileri tutulýan ünsi berýär diýlip, habarda bellenilýär.
