«Çalik Enerji» türk kompaniýasy 2025-nji ýylyň 22 — 24-nji oktýabrynda Aşgabatda geçiriljek «Türkmenistanyň nebiti we gazy — 2025» («OGT 2025») atly halkara maslahatyň we serginiň platina hemaýatkäri hökmünde çykyş eder.
«Çalık Holdingiň» düzümine girýän, 1998-nji ýylda esaslandyrylan «Çalık Enerji» Ýewraziýanyň energetika pudagyndaky öňdebaryjy kompaniýalaryň biridir. Onuň iş ugurlary taslamalaryň dizaýn edilmegi, gurluşyk işleri, gaýtadan dikeldilýän energiýa çeşmeleri, elektrik stansiýalarynyň ekspluatasiýasy hem-de elektrik energiýasynyň paýlanyşy we satuwy ýaly köp ugry öz içine alýar.
Kompaniýa Türkmenistanda milli energetika infrastrukturasynyň ösüşine uly goşant goşdy. Onuň amala aşyran taslamalary içerki bazary elektrik energiýasy bilen üpjün edýär we eksport mümkinçiligini döredýär. «Çalık Enerji» energetika ulgamlarynyň modernizasiýasyna işjeň gatnaşýar, öňdebaryjy inženerçilik çözgütlerini ornaşdyrýar we ekologiýa netijeliligine aýratyn üns berýär.
«OGT 2025» forumyna dünýäniň öňdebaryjy energetika kompaniýalarynyň we dürli ýurtlaryň ministrleriniň, maýa goýujylaryň hem-de bilermenleriniň gatnaşmagyna garaşylýar.
Häzirki wagta çenli foruma gatnaşmaga isleg bildiren 70-den gowrak ýurduň 1000-den gowrak wekili hasaba alyndy, şolaryň arasynda täze kompaniýalar we ilkinji gezek gatnaşýan wekiller hem bar. Bu gatnaşyjylar üçin täze iş gatnaşyklaryny ösdürmek we halkara hyzmatdaşlygy giňeltmek üçin aýratyn mümkinçilikdir.
