Türkmenistanyň Prezidenti Serdar Berdimuhamedow sişenbe güni “Awaza” Milli syýahatçylyk zolagynda geçirilýän BMG-niň Deňze çykalgasy bolmadyk ösüp barýan ýurtlar boýunça üçünji halkara maslahatynyň (LLDC3) mejlisinde çykyş edip, 2030–2040-njy ýyllar üçin wodorod energetikasyna geçmek boýunça ählumumy maksatnamanyň döredilmegi baradaky başlangyjy öňe sürdi. Bu barada “Business Turkmenistan” habar berýär.
Döwlet Baştutany bu ugurda BMG-niň çäklerinde geljek ýyldan başlap degişli maksatnamanyň taýýarlanyş usullaryny ara alyp maslahatlaşmak işine başlamak teklibini öňe sürdi.
Prezident Serdar Berdimuhamedow Türkmenistanyň gaýtadan dikeldilýän energiýa çeşmeleri boýunça özara bähbitli hyzmatdaşlygyň giňeldilmegini yzygiderli goldaýandygyny belläp, ýurdumyzyň wodorod energetikasynyň ösüşine goşant goşmaga taýýardygyny nygtady. Munuň üçin anyk hyzmatdaşlyk meýilnamalarynyň we gatnaşyklaryň sazlaşykly algoritmleriniň işlenilip düzülmelidigi aýratyn nygtaldy.
Serdar Berdimuhamedow öz çykyşynda Türkmenistanyň halkara energetika giňişligindäki işini BMG-niň degişli resminamalaryna laýyklykda alyp barýandygyny belläp, energetika ulgamynyň ähli gatnaşyjylary — öndürijiler, geçirijiler we sarp edijiler tarapyndan halkara ekologiýa standartlarynyň we howanyň üýtgemegi bilen bagly borçnamalarynyň berjaý edilmelidigini nygtady.
Ekologiýa ugurly gün tertibiniň çäklerinde Prezident Serdar Berdimuhamedow Türkmenistanyň aýlanma ykdysadyýete geçmek boýunça ählumumy çäkli maksatnamanyň döredilmegi baradaky başlangyjyny ýatladyp, ykdysady ulgamynda alnyp barýan işlerde hemmesiniň ekologiýa talaplaryna laýyk gelmelidigini belledi. Türkmenistanyň maksatnamasynyň esasy ugrunyň tebigy gurşawy goramaga ýardam berýän önümçilik nusgasyny düzmeginden ybaratdygy nygtaldy.
BMG-niň Deňze çykalgasy bolmadyk ösüp barýan ýurtlar boýunça üçünji halkara maslahaty 2025-nji ýylyň 4-nji awgustynda “Awaza” Milli syýahatçylyk zolagynda öz işine başlady we 8-nji awgusta çenli dowam eder.
